食評:揚一帆

飯意 Rice Love 街坊價得嚟又有特色,香港平價餐廳十大之選!餐廳喺旺角廣華街,人流唔多但平民餐廳林立,算係旺角一條小小食街。我哋去到餐廳大約兩點,店員推介呢個兩點後嘅menu【秋夏傾城3重奏】,一個主菜加錢有特飲同小食。

特飲係【菠蘿特飲+$12】,用一個透明玻璃jar裝住嘅菠蘿梳打,裡面好多大大粒菠蘿果肉,夏天見到真係透心涼。咁大杯又多果肉,+$12就飲到,必點之選。

小食我哋揀咗【芝士烤大菇$18】。熱辣辣嘅大菇上面係烤過嘅半溶芝士,一啖咬落去就出汁,好juicy,配合半溶嘅芝士好滋味。

主菜揀咗【蒜香扒大虎蝦配脆皮天使麵$78】,大虎蝦夠晒大隻但其實蝦身幾細,蝦肉唔多,還好味道不錯。脆皮天使麵就有特色,面頭炸到麵餅咁,香脆可口。

【安格斯牛漢堡 熱熔芝士鐵板熔岩蛋漿飯$108】餐廳一大特色系列~店員拎埋個煎pan出嚟,上面係一大兜半熱熔芝士,然後即席先將蛋漿倒入熱辣辣嘅鐵板,再將煎pan入面嘅芝士倒喺漢堡上面。芝士拉絲效果好誇張,鏡頭都差啲影唔到。芝士同蛋漿撈埋又香又滑,漢堡就稍為乾身唔夠juicy,但夠大件夠厚,食完好鬼飽。

【即磨咖啡+$7】跟主食+$7就有熱飲,用紙杯裝真係簡約咗啲,不過飲得出係即磨咖啡,味道香濃。