食評:stephanie ball

呢間係我睇完某間傳媒報導完之後去既~因為見到佢無論份量同價錢都算幾平,所以今日就去深水埗分店食一食,點知一試後,發現Rice Love飯意絕對係大件夾抵食既香港新品牌!

當日7點左右到達都已經入座咗超過8成,好彩行快10分鐘,因為坐低無幾耐已經要等位喇~現場主要由3位職員幫手,雖然有咁多客人但態度同上菜速度都無減慢,值得一讚。

首先環境方面都好企理,無特別既特色裝潢但感覺幾舒服,簡簡單單。MENU方面都好多選擇,牆身仲貼住比較特別的菜式,睇圖片都幾吸引。仲有一張特價無限點MENU,要每位都幫襯主菜一款就可以用超級優惠既價錢無限點小食,好可惜當日小妹無點每人一款主菜,所以叫唔到。

酥皮海皇忌廉湯 $28 (跟餐+$22)

望落都吸引,畢竟唔係間間餐廳都有出酥皮湯,所以見到就要叫
個湯都幾Creamy, 好彩唔係好多煙肉所以無咁咸,初初食因為好熱所以只飲上面面頭,點知愈飲愈有驚喜,有青口、大蜆、魷魚,仲唔到又幾多料,好似執到寶咁

蒲燒珍寶鰻魚蛋包飯 $88

原圖同實物好似唔同咗(深水埗限定?)~ 其實圖片係將條鰻魚同蛋包飯放埋一齊,而家上枱就分開上~鰻魚+少量紫菜+少量沙律放一碟,蛋包飯就一碗上 雖然味道唔會有影響但成個感覺唔同哂
鰻魚方面都算屬於少少肥美,另外長度十足,味道方面就中規中矩,同圖片提及足25cm應該都無呃人既

由於個飯分開食,所以個飯無汁,相對比較乾,所以建議食呢個飯要將鰻魚個汁淋上個飯到,先食到鰻魚飯既精髓

燒原條BBQ豬肋排骨 $70

哩款菜式係MENU到只係小食,估都估唔到,不過呢個豬肋排骨絕對對得住呢個價錢之餘仲要超級抵食,三個字:平、靚、正!

$70有咁大條既豬肋排骨都實屬稀有,加上佢燒到好JUICY一D都無乾仲要好厚肉,佢個漿汁都好味,酸酸甜甜咁,所以呢款”小食”小妹100分推介

原本對豬肋排骨感覺麻麻地,因為之前多數食OutXXXX 既”恐龍骨”,覺得少肉之餘仲要幾乾,一切即散,最緊要價錢都唔平,所以小妹對類似既排骨無咩好感但今次真係喜出望外!

芒果乳酪 $19

呢杯飲品完全幫到手解一解肥膩感,因為今餐叫既所有野都好膩,所以感覺好Fresh, 份量2個人飲都岩岩好

總括”飯意”推出既菜式都係屬平價位但用料唔差,服務都唔錯,如果成班朋友去食,任叫都唔會肉痛,小妹見到好似仲有包場服務,所以有興趣既朋友可以試一試!