食評:chihuocouple

上星期出左個優惠,話過會再介紹佢既主食,今日黎還數!食左咁多次,Rice Love 絕對係糧尾之選!還有就係,深水埗得返最後2日成本價叫小食啦!
______________________
🔹蒲燒珍寶鰻魚蛋包飯 $88
佢上枱唔似張相咁, 將鰻魚放喺蛋包飯上面一碟過上, 而係分開上。唉, 唯有自己搬返條魚過去啦, 無論喺賣相同氣勢上都扣左分。
.
蛋皮明明望落都幾溫溜,個面有少少蛋汁, 味道係唔錯, 可惜偏薄, 咬感無咁好
.
鰻魚就原條上,幾肥美😍而且骨好細, 口感幾好。可惜佢落得太多汁, 搞到偏咸。
.
碟旁邊另外放左啲紫菜, 加啲喺飯面一齊食, 別有風味, 最犀利係食到最後都重係好脆, 而且好香炒芝麻味。
.
飯係珍珠米,煮得較濕身較淋
.
佢仲會有埋蘋果沙律跟埋俾您,其實幾抵食
_____________________

深水埗飯意為左慶祝開店三週年, 搞左個成本價小食優惠, 每人只要惠顧一份主食, 就可以以成本價無限量享用一大堆美味小食, 正呀😍
.
飯意嘅主食本身都係又平又好食, 有興趣可以禁返下面個tag參考返我地之前嘅post 呀!
#chihuo飯意
.
‼注意返係深水埗分店先有呀。‼
_______________________
🔹雞翼 $2/隻(每款最少叫兩隻)
今次參加特價小食有三款口味既雞翼,分別係香茅/蜜糖/香草味

雞翼味道3款都偏淡, 但由於煮法唔同, 蜜糖雞翼無咁乾身, 食落會肥美啲。建議大家可以多叫蜜糖口味。

🔹鹽酥雞球 $3/件(最少2件)
雞球味道幾香, 雖然粉係厚左少少, 不過因為本身啲粉都好夠味, 我食落仲差啲以為係薯蓉添😂

🔹炸魷魚圈 $3/件(最少2件)
魷魚圈有大有小, 唔會炸到好乾身, 但食嗰時要小心入面有可能有筋, 可以咬走佢唔好夾硬食呀。

🔹吉列帶子 $2/件(最少2件)
炸得剛剛好, 好脆口!可惜帶子比較薄身, 應該係開左一半, 食落會感覺個粉略厚, 影響口感。

🔹煙葱奶油藍青口 $25
留意返青口係一份份咁叫, 唔係逐隻叫😂
奶油就咁試幾好味, 好似金寶忌廉湯既味。
.
但用黎做青口汁就淡左少少, 加上奶油比較稀, 食嘅時候建議要連埋煙肉同青口一齊食,咁就夠晒味喇。青口唔會好細隻, 而且有十幾隻, 絕無欺場。

🔹印度烤餅配咖哩汁 $5/塊
咁多小食入面,我最中意呢款!一開四,每塊一口size. 食落好似台灣手抓餅,幾惹味,仲會配個咖哩汁,食落味道更豐富。

我地梗係唔會只係食左咁少野,之後幾日先陸續出佢既主食介紹
.
💡再提多你一次,個優惠得深水埗分店先有架!同埋得星期一至五先有架!
.

收到官方信息原來做到2月13號JA,未食既朋友好快的去啦!!!

_________________________
飯意主題餐廳
📍深水埗元州街146號華興大樓地舖
🚇長沙灣站a2出口
⏰11:00-23:00
📞23611611